ئیدارەی سینەما سالم رایدەگەیەنێت، هێزەكانی ئاسایشی سلێمانیی رێگری لە نمایشكردنی فیلمی “لەپێناو ئازادیدا” دەكەن، ئەوەش لەكاتێكدایە بڕیارە بوو رۆژی سێشەممە فیلمەكە نمایش بكرێت.
لە رونكردنەوەیەكی سینەما سالم-دا هاتوە “دوای ئەوەی بڕیاربوو سینەما سالم لە شەوی سەری ساڵدا فیلمی “لەپێناو ئازادیدا”، لە دەرهێنانی ئەرسین چەلەك نمایش بكات، رۆژی، دووشەممە بە پاساوی ئاسایش و ئارامی شار” لە لایەن ئاسایشی سلێمانییەوە ئاگادار كراینەوە كە “نابێت ئەو فیلمە نمایش بكرێت”.
ئیدارەی سینەما سالم جەختیكردوەتەوە، “فیلمی “لەپێناو ئازادیدا” گێڕانەوەی ڕووداوێكی مێژووی نیشتمانەكەمانە و فیلمی گێڕانه‌وه‌ی 100 رۆژ گه‌مارۆدانی ناوچه‌ی سوری ئامه‌ده‌، له‌لایه‌ن حكومه‌تی توركیا له‌ ساڵی 2016، كه‌ تیایدا ژماره‌یه‌كی زۆر له‌ گه‌نجانی كورد له‌و شارۆچكه‌یه‌دا کوژران.

شایانی باسە شەڕی خەندەقەکان کە پەکەک و تورکیا پێکەوە دەستیان پێکرد و بوونە هۆی خاپوورکردنی چەندین شار و دەیان گوند و ناوچە لە باکووری کوردستان ئەنجامەکەشی جگە لەم هەموو کاولبوونەی مادی، بووە هۆی کوژرانی سەدان کەس و ئاوارە بوونی سەدان هەزار کەسی دیکە. ئەم فیلمە لەپەنجەرەی پەکەکەوە ئەو رووداونە دەگێڕێتەوە کە قارەمانەکەی پەکەکە و داگیرکەرەکەش تورکیا بەڵام لەکۆتایدا قارەمانەکە هەڵدێت و خەڵکەکەش ئەوەی کوژراو و بریندار و ئاوارە بوو بوو و ئەوەشی ما دەستەئەژنۆ چاو لە ئاسۆی تاریک دەکات.