هەفتەی رابردوو، لە كۆنگرەی هەشتەمی پارتی یەكێتی دیموكرات، ناسراو بە (پەیەدە)، کە لە شارۆچكەی رمێلانی سەر بە کانتۆنی قامشلۆ بەڕێوە چوو، تیایدا هەریەك لە ئایشە حەسۆ و ئەنوەر موسلیم بە هاوسەرۆكانی پارتەكە هەڵبژێردران، بەشێوەیەکی کەمتر دروشم و کاریگەرییەکانی پەکەکە بەسەر پەیەدەدا دەرکەوتن، تەنیا وێنەیەکی عەبدوڵا ئۆجەلان نەبێت کە لە لای دەستی راستی هۆڵەکە هەڵواسرابوو.

چاودێرانی سیاسی پێیان وایە، پەیەدە (باڵی پەکەکە لەکوردستانی سوریا) لە ماوەی رابردوودا هەوڵی داوە خۆی لە هەژموونی قەندیل دەربهێنێت، ئەوەش لەدوای کۆنگرەی پەیەدەوە دیار بووە. ئەندامێکی ئەنجوومەنی نیشتمانیی کوردیش جەخت لەوە دەکاتەوە، کە بۆ پەیەدە ئەستەمە بتوانێ لەو چوارچێوەیەی پەکەکە بۆی دیاری کردووە، بێتە دەرەوە.

لە ماوەکانی رابردوودا، بەتایبەتی لەدوای لەدەستدانی عەفرین و گرێ سپی و سەرێ کانی و چەند ناوچەیەکی فراوانی کوردستانی سوریا و کەوتنە دەستی تورکیا بە هاوکاری رووسیا، لەناوخۆی پەیەدە و هەسەدە دەنگێک بەرز بووەوە، کە پەکەکەی بە خاوەن سیاسەتێکی هەڵە بۆ سەر کوردستانی وەسف دەکرد، هەروەها بەهۆی فشارەکانی ئەمەریکا لەسەر پارتی یەکێتی دیموکراتی و هێزەکانی سووریای دیموکرات، کە خۆیان لە هەژموونی پەکەکە دوور بخەنەوە، کە لە ”لیستی تیرۆر“ی ئەمەریکادایە، ئەوە کاریگەری کردووەتە سەر هەوڵی خۆدوورخستنەوەی پەیەدە و هەسەدە لە هەژموونی پارتی کرێکارانی کوردستان، کە ئێستا لە لایەن جەمیل بایک لە قەندیل ئاراستە دەکرێت، بەڵام لەگەڵ ئەوەشدا، بە بڕوای بەشێک لە چاودێرانی سیاسی، بۆ پەیەدە و هەسەدەش ئەستەمە بتوانن بە کاتێکی کەم و بڕیاری بەپەلە خۆیان لە قەندیل داببڕێنن، چونکە پەکەکە چوارچێوەیەکی بۆ دامەزراندوون، شکاندنی کۆتەکانی وا ئاسان نییە.


لەمبارەیەوە، د.کاوە عەزیزی، ئەندامی ئەنجوومەنی نیشتمانیی کورد لە سووریا دەڵێت: کێشەی پەیەدە و هەسەدە و هەموو هێزە گرێدراوەکانی سەر بە پەکەکە ئەوەیە، سیستەمێکیان لەلایەن پەکەکەوە بۆ دانراوە، ئەستەمە وا بەئاسانی بتوانن لێی دەربچن، ئەگەر بێتوو خۆشیان مەیلی ئەوەیان هەبێت. پەکەکە نەک هەر بۆ هێزە گرێدراوەکانی بووەتە بەڵا و کاریگەریی خراپی داناوە، بەڵکوو بۆ کوردیش لە رۆژئاوای کوردستان بووەتە جێگەی مەترسی و لە رابردوودا زیانی گەورەی لە کورد و رۆژئاوای کوردستان داوە.

بەڵام، ئاراس عەبدوڵا، چاودێری سیاسی و نێودەوڵەتی دەڵێت: سه‌ره‌ڕای هه‌بوونی وێنه‌ی عەبدوڵا ئۆجه‌ڵان له‌ناو کۆنگره‌ی هه‌شته‌می په‌یه‌ده‌دا، که ‌له‌ کۆتایی مانگی شوباتی ٢٠٢٠ به‌سترا، بەڵام په‌یه‌ده‌ هه‌وڵی داوە کۆنگره‌ی ئه‌مجاره‌ی دوور له‌ دروشمه‌کانی په‌که‌که‌ بێت، به‌تایبه‌تی له‌ به‌یاننامه‌ی کۆتایی کۆنگرەدا، کە‌ به‌شێوه‌یه‌کی سه‌ره‌کی تیشکی خستووەتە‌ سه‌ر بارودۆخی ناوخۆی سووریا و تەنانەت ‌خاڵێکی گرنگی به‌یاننامه‌که‌، به‌بێ هه‌بوونی هیچ مه‌رجێک باس له‌ یه‌کڕیزی و یه‌کده‌نگی پارته‌ کوردییه‌کانی رۆژ ئاوا ده‌کات، ‌ده‌رچوونی (عائیشه‌ عیسا و ئەنوەر موسلیم) به‌ خاڵێکی تری ئەرێنی داده‌نرێت، چونکه‌ ئه‌م دوو که‌سایه‌تییه، که‌متر کاریگه‌رییه‌کانی په‌که‌که‌یان به‌سه‌ره‌وه ‌دیاره‌، لەبەرئەوە ده‌توانین بڵێین، په‌یه‌ده‌ له‌ هه‌وڵی ئه‌وه‌دایه‌ خۆی له‌ ئه‌ژموونی په‌که‌که‌ دوور بخاته‌وه‌ و کاریگه‌رییه‌کانی که‌متر بکاته‌وه‌. ئه‌مەریکا هاوکاری دارای و سه‌ربازی په‌یه‌ده‌ ده‌کات و‌ په‌که‌که‌ش له‌ لیستی تیرۆری ئه‌مەریکادایە،‌ له‌ لایه‌کی ترەوە تورکیا هاوسنووره‌، بۆ ئه‌وه‌ی پارێزراو بن، ده‌بێت ئه‌ژموونی په‌که‌که‌ که‌م بکه‌نه‌وه، له‌ کاتی هێرشی تورکیا بۆ سه‌ر کوردستانی، هه‌رێمی کوردستان و سه‌رکردایه‌تی سیاسی باشوور، فشارێکی نێوده‌وڵه‌تییان دروست کرد، بۆ ئه‌وه‌ی هێرشی تورکیا رابگیرێت، به‌م جۆره‌ش قۆناغی په‌یوه‌ندییه‌کانی باشوور و رۆژئاوا چووه‌ قوناغێکی باشتر، که‌ ئه‌مه‌ش به‌ هۆکارێکی سه‌ره‌کی داده‌نرێت کە بە دڵی پەکەکە نییە.

ناوبراو لەکۆتایدا وتی: پەیەدە دەیەوێ بەشێوەیەکی لەسەرخۆ و هەنگاو لەدوای هەنگاو، هەژموونی پەکەکە لە خۆی کەم بکاتەوە، پەیەدە ناتوانێت به‌ شێوه‌یه‌کی راشکاوانه‌ ئه‌م هه‌نگاوه‌ ئه‌نجام بدات، له‌ ترسی ئه‌وه‌ی ده‌نگی ناڕازی له‌ناو حزبه‌که‌یان دروست نه‌بێت و خۆیان له‌ ئه‌گه‌ری له‌تبوون بپارێزن، له‌ لایه‌کی تریشەوە، په‌که‌که‌ تا ئێستا توانای ئه‌وه‌ی هه‌یه‌ کێشه‌ بۆ په‌یه‌ده‌ دروست بکات، به‌تایبه‌تی ده‌توانێت باڵێک جیا بکاته‌وه‌، لەبەرئەوە‌ هه‌نگاوه‌کان به‌ شێوەیه‌کی له‌سه‌ره‌خۆ و ترسه‌وه‌ ده‌نرێن.

شما هم می توانید دیدگاه خود را ثبت کنید

√ کامل کردن گزینه های ستاره دار (*) الزامی است
√ آدرس پست الکترونیکی شما محفوظ بوده و نمایش داده نخواهد شد


قالب وردپرسدانلود رایگان قالب وردپرسپوسته خبری ایرانیقالب مجله خبریطراحی سایتپوسته وردپرسکلکسیون طراحی