پێشتر پەکەکە لە 13ی تەمووزی 2013، بە ناوی دەستەی جێبەجێكاری كانتۆنی جەزیرە لە رۆژئاوای كوردستان، بڕیاری دا سەربازیی زۆرەملێ بسەپێنێت، دواتر هەمان بڕیار لە كانتۆنەكانی كۆبانێ و عەفرین پەسند كرا و بەدوای ئەوەشدا دەستی بە گرتنی گەنجان و لاوانی رۆژئاوای کوردستان کرد، کە بەو هۆیەوە ژمارەیەکی زۆریان ئاوارەی وڵاتان و هەرێمی کوردستان بوون.

***

ئێستاش ئەو بڕیارانە بەدەستکارییەوە، لە چوارچێوەی (یاسا)دا بەناوی (ئەرکدارکردنی سەربازیی تایبەت) دەرکراون، کە پێشبینی دەکرێت لەمەودواش، بەناوی ئەو یاسایەوە هەڵمەتێکی چڕی دەستگیرکردن بۆ ئەو گەنج و لاوانە دەست پێ بکات، کە ئامادە نین سەبازیی بەزۆر لە خۆرئاوای کوردستان بۆ یەپەگە و هەسەدە، کە دوو هێزی گرێدراوی پارتی کرێکارانی کوردستان (پەکەکە)ن، بکەن.

***

 لە هەفتەی رابردوودا، ئەنجومەنی خۆبەڕێوەبەریی رۆژئاوای کوردستان، کە لەژێر هەژموونی PKKدایە، بڕیارێکی بەناوی (یاسا)وە بۆ ئەركداركردنی سەربازیی تایبەت بە ناوچەكانی خۆبەڕێوەبەرییەكەی پەسەند کرد، کە لە 35 ماددە و چەندین بڕگە پێكهاتووە و تێیدا مەرجەكانی خزمەتی سەربازی و ماوەی تەواوبوونی ئەركە سەربازییەكان و چەندان بابەتی دیكەی تایبەت بە سیستەمی سەربازی جێگیر كراون.

***

بەپێی یاساکەی پەکەکە، لە رۆژئاوای کوردستان سەربازیکردن بۆ گەنجان بەزۆر دەبێت و لە هەر شوێن و شارێکیشدا تەمەنێک دیاری کراوە.

***

لەمبارەیەوە، خالد عەلی، ئەندامی ئەنجومەنی نیشتمانی کورد لە سووریا وتی: ئێمە وەکوو ئەنجومەنی نیشتمانیی کورد، دان بەو یاسایانەدا نانێن، کە لە دامەزراوەی ناشەرعییەوە و لەژێر هەژموونی پەکەکە و هێزە گرێدراوەکانیەوە دەردەکرێن، ئەو بڕیارانەی پەکەکە بە ناوی یاساوە دەریان دەکات، ناشەرعیبوونیان لەوەدایە کە لە دامەزراوەیەکی هەڵبژێردراوی خەڵکەوە دەرنەکراون، بەپێچەوانەوە، بڕیارێکن بۆ دژایەتیی خەڵک و بۆ بەرژەوەندیی تەسکی حزبێکی دیاریکراو دەردەکرێن و ئەوەش لە رۆژئاوا ناڕەزایی زۆری دروست کردووە. لە هەر شارێک تەمەنێک دیاری کراوە و لە هەر شوێنێک بە شێوەیەکە، بۆ نموونە لە قامشلۆ شێوەیەکە و لە کۆبانێ بە شێوەیەکی ترە و بۆ پێکهاتەکانی دیکەی جیا لە کورد جیاوازترە و بەو ویستە دەرکراوە کە پەکەکە دەیەوێ و سوودی سەربازیی لێ وەردەگرێت. پێشبینی دەکەن لە پەنای ئەو بەناو یاسایەوە، هەڵمەتێکی رەشبگیربی گەنجان و لاوانی رۆژئاوا دەست پێ بکرێت و ئەوەش کۆچێکی زۆری گەنجانی لێ بکەوێتەوە کە دواجار بە زیانی کورد و گۆڕینی دیمۆگرافیای رۆژئاوای کوردستان دەشکێتەوە، پەکەکە بۆ بڕیارەکانی، پرس و ڕا بە هیچ لایەنێک و خەڵک ناکات و خۆی لێ بووەتە حاکمێکی موتڵەق و ئەوەش بۆ داهاتووی رۆژئاوای کوردستان مەترسیدارە، کە تا ئێستا بەهۆی ئەو عەقڵیەتەوە زیانی زۆری بەر کەوتووە.